Даниил Крамер Коктебельге джаз фестивальге экинджи кере кельди. О, насыл эсерлер чаладжагъыны эвельден хабер этмей, эм де тек сейирджилерге дегиль де, сыкъ алда атта озь командасына. Оркестр-адам ве толусынен бекленильмеген адисе – о, озю бойле дей ве чокътан берли берабер чалгъанларны бойле къыйнай биле.
Даниил Крамер классиканы ве джазнынъ земаневий акъынтыларыны берабер къошып чала, ве шу дакъкъада «ресимнинъ манасына» келишкен тильде сёйленмек онынъ ичюн табийдир.
«Свинг, юксек дереджели техника, чалгъы алетлери – бу фырчылар, боялар ве кягъыт. Эр бир музыкант озь ресими ичюн услюбиет сече. Мен сейирджилер ичюн озь джаз ресимими яратам. Мен импровизатор ве бугунь залны, зенаатдашларымы ве озюми ненен айретте къалдыраджагъымы бильмейим. Санагъа чыкъмаздан 10 дакъкъа эвель, муитни корьгенде ве дуйгъанда, эр шейни денъиштире, боза билем. Бойле шейлер ичюн суперконтакт керек», – деди тебессюм иле Крамер.
Матбуат-конференцияда Koktebel Jazz Party фестивалининъ логотипине бакъып, ресимде пианоджы догъру отурмагъаныны абайлады.
«Бу йигит яхшы аккордны чалмаз», – деп, щакъалашты Даниил.
О, озю чыкъышлар девамында бираз ойнай ве инъильдей – бойле этип, ноталар ичтен, гонъюльден чыкъа, музыканы тап аш къазанымнен дуям, дей.
Коронавирус ве самоизоляция себебинден онынъ 60-йыллыгъына багъышлангъан юбилей концерт дёрт кере башкъа вакъыткъа кечирильди, амма эписи бир октябрьде олып кечеджек. Бойле вакъиалар земининде о, охшайыджы кунеш алтында, сыджакъ денъиз саилинде зенаатдашларнен корюшкенине пек къувана.
«Тедбирлер лягъу этильгени – буюктен-буюк миллионлардже зарар, ве мен Къырымдаки фестивальге миннетдарым, о фаалиет гъайрыдан тикленилювининъ къарылгъачы олды», – деди Даниил Крамер.
Даниил Крамернинъ триосы музыкаль ресимини энди саат 19.00 яратаджакъ