Къырым язынынъ энъ муим музыкаль вакъиасы – Koktebel Jazz Party халкъара джаз фестивали башланмасына бир суткадан аз вакъыт къалды. Августнынъ 21 – 23 куньлери фестивальнинъ сейирджилерини ярымаданынъ энъ дюльбер ерлеринден биринде, артистик Коктебель къасабасында Русие ве халкъара джаз усталарынынъ чыкъышлары беклей. Денъиз ве джаз яраткъан байрам муитини Акъмесджитке учып кельгенинънен ис этмек мумкюн оладжакъ: фестиваль арфесинде ве онынъ эписи куньлери девамында Къырым мусафирлери ава лиманда онынъ йылдызлары – Лариса Долина, Игорь Скляр ве Сергей Мазаевнинъ селямлашувларыны ве Koktebel Jazz Party фестивалине давет этювлери иле аудиороликлер эшитеджеклер.
2020 сене фестивалине тешкилятчылар бинълердже киловатт къуветинде йигирми тонна сес ве ышыкъ донатмасыны кетирдилер. Бу шейлер ачыкъ авада джаз байрамынынъ текрарланмаз муитини яратмагъа ярдым этеджек. Зияретчилернинъ онъайтлыгъы ичюн KJP сайтында эписи мейданлар ве андаки эсас сервислер къайд этильген харита ерлештирильди.
Koktebel Jazz Party бу сене Эсас ве Волошин саналарында кечеджек. Волошин санасына кириш адетиндже бедава. Эсас санадаки концертлер акъшам саат едиде башлана ве яры геджеге якъын екюнлене. Волошин санасынынъ программалары уйледен сонъ, саат учьте башлана. Артистлер чыкъышларына билетлерни фестивальнинъ сайтында ве онынъ мейданларындаки кассаларда сатын алмакъ мумкюн. Кириш билетлернинъ фияты — 500 рубле, партерге билетлернинъ фияты — 1500 рубле.
Биринджи куню Эсас санада Петр Востоковнынъ реберлигинде буюк джаз оркестри, Esh адлы бразиль джаз ансамбли, Manka Groove адлы русиели такъым, Лариса Долина ве Хибла Герзмава иштираги иле Яков Окуннинъ йылдызлы ансамбли чыкъышта булунаджакълар.
Джума эрте программасында Анастасия Лютова ве онынъ «Лютый бенд» адлы такъымы, Wild Brass такъымы, саксофонджы, KJP фестивалининъ арт-мудири Сергей Головня ве Русие халкъ артисти Игорь Скляр Jazz Classic Community иле иштирак этеджеклер. Джума эрте акъшамы «Моральный кодекс» рок-группасынынъ чыкъышы иле екюнленеджек.
Фестивальнинъ сонъки куню Эсас санада озь сетлерини Даниил Крамернинъ триосы, CHETMEN коллективи, Сергей Головнянынъ реберлигинде Карина Кожевникованынъ иштираги иле «SG BIG BAND» бэнди такъдим этеджеклер. Бундан гъайры учюнджи куннинъ программасында ерли джазнынъ патриархы, деп, адландырылгъан, Игорь Бриль ве онынъ огъланлары, саксофонджылар Александр ве Дмитрийнинъ Bril Family такъымы, эм де джаз йырджысы Мариам Мерабова оладжакълар.
Koktebel Jazz Party-2020 фестивалинде четэль иджраджылар да иштирак этеджек – адетиндже оларнынъ адлары ачылув куню, августнынъ 21 куню, сеслендириледжек. Джаз эписи сынъырларны силе ве атта карантин сынъырланувлар девиринде бирлештире, деген фикирни тасдыкълап, дюнья джазынынъ йылдызлары «Ышыкъ сурьаты иле джаз» адлы программада иштирак этеджеклер, о, телекопюр форматында кечеджек.
Фестивальнинъ толу программасы Koktebel Jazz Party сайтында нешир этиле.
Фестиваль иштиракчилерининъ ве онынъ сейирджилерининъ хавфсызлыгъы темин этильмеси ичюн, тешкилий комитет Роспотребнадзор идаресининъ коронавирус боюнджа талапларына дикъкъат айыраджакъ.
2020 сене апрель айында Koktebel Jazz Party фестивали «Россия сегодня» халкъара информацион агетлиги ве «Красный квадрат» адлы медиагруппасы иле бераберликте Doctor Jazz Party онлайн-марафоныны тешкиль этти. Бойле этип коронавирус пандемиясына къаршы куреш девиринде Русиели тиббийджилерге ве хастаханелерге къолтутылды. Марафон Халкъара джаз куню, апрельнинъ 30-да башланды. О, Рунет лидери, ria.ru сайтында ве ВКонтакте саифесинде РИА Новости агентлигининъ ресмий аккаунтында алып барылды. Doctor Jazz Party адлы онлайн-марафон докъуз мемлекеттен джаз музыкасынынъ йылдызларыны, шу джумледен Русие, Къытай, АКъШ, Бразилия, Япония чалгъыджыларыны бирлештирди. Марафон еди саат девам этти, иштиракчилернинъ чыкъышларыны эки миллионгъа якъын адам сейир этти.