Русие ве АКъШ, Италия, Френкистан, Бразилия, Хиндистан, Япония ве Эрменистан мемлекетлерининъ иджраджылары, - Doctor Jazz Party хайрие онлайн-марафонынынъ музыкаль джогърафиясы бойле. Марафон апрельнинъ 30-нда, халкъара джаз куню, Москва сааты боюнджа куньдюз 16.00 башлана.
Doctor Jazz Party адлы марафон Русие хастаханелерине ве оларнынъ хадимлерине, эким ве тиббий персоналгъа къолтутмакъ макъсадынен кечириледжек. Марафоннынъ тешкилятчылары – "Россия сегодня" халкъара информацион агентлиги, "Красный квадрат" медиагруппасы ве Koktebel Jazz Party халкъара джаз фестивали. Тешкилятчыларгъа Русиеде догъру инвестициялар фонды (РФПИ) ве COVID-19 коронавирускъа къаршы куреш боюнджа Альянс къолтута.
«Шимди, коронавирус пандемиясы себебинден пейда олгъан умумий белянен крушювде четте къалгъанлар олмасы мумкюн дегиль. Ола бильген эписи чарелер ве эписи тырышувлар бакъылмакъ, япылмакъ керек. Джаз эр вакъыт азатлыкъ ве умют берген музыка эди. Тамам шимди, адамлар къолтутувгъа мухтадж олгъан вакъыт, джаз рухий ве дуйгъу джеэттен ёл ола. Бизим Doctor Jazz Party марафонымызда чокъусы мемлекетлернинъ йылдызлары чыкъышта булунаджакълар, амма муими шунда ки, олар – первасыз къалмагъан инсанлар, олар ич бир сынъырларгъа бакъмадан, джогърафик, сиясий, сынъырлар насыл олса олсун, ярдымгъа кельмеге азырлар», - деп, къайд этти Koktebel Jazz Party фестивалининъ темельджиси, русиели журналист Дмитрий Киселев.
Хайрие онлайн-марафонында Игорь Бутманнынъ мешур квартети, виртуоз Даниил Крамернинъ ве контрабасчы Сергей Корчагиннинъ дуэти, эфсаневий джаз боразанджысы, «Грэмми» мукяфатыны чокъ кере къазангъан Рэнди Брекер, джаз вокалджылары Лариса Долина ве Мариам Мерабова, рок-йырджы Юлия Чичерина, саксофонджы, бестекяр, Koktebel Jazz Party фестивалининъ арт-мудири Сергей Головня ве чокъусы дигерлер иштирак этеджеклер. Doctor Jazz Party марафоны иштиракчилерининъ толу джедвели koktebel-jazz.ru (https://koktebel-jazz.ru/news_2020/20200427/1013434012.html#head) сайтында нешир этильген.
Онлайн-марафон шу джумледен «Джаз ышыкъ сурьаты иле» серлевалы программадан ибарет оладжакъ. Бу программа ильк сефер Коктебельдеки фестивальде 2006 сенеси амельге кечирильген эди ве Koktebel Jazz Partyнинъ айырылмаз бир къысмы олды. Программанынъ эсас гъаеси - джаз эр бир сынъырларны сильгенини, джазменлерни екяне бир виртуаль фезада импровизация ичюн бирлештиргенини косьтермек. Бу музыкаль кучьни тасдыкъламакъ ичюн Doctor Jazz Party марафонынынъ тешкилятчылары Санкт-Петербург иле видеокопюр боюнджа аньаневий джем-сейшн кечиреджеклер.
Марафоннынъ яйынлавы ria.ru ве Koktebel Jazz Party фестивалининъ сайтларында ве «ВКонтакте» ичтимаий агъынынъ аккаунтларында, эм де стопкоронавирус.рф сайтында алып барыладжакъ. Марафоннынъ ресмий хэштеги #МыВместе олды.
Русие хастаханелерине къолтутмакъ ичюн, эм де региональ стационарларда ве клиникаларда тиббий хадимлерге шахсий къорчалав васталарыны сатын алмакъ ичюн параларны «Живой» адлы хайрие фондынынъ къолтутувынен кечирмек мумкюн. Бу фонд марафоннынъ операторы олды. Бунынъ ичюн «ДЖАЗ» сюзю пара колеми бельгиленген СМС-месаджны (меселя, «ДЖАЗ 300») къыскъа 3443 номерагъа ёлламакъ керек. Бойле садакъа паралар къабул этилюви энди ачыкъ.
Doctor Jazz Party марафоны черчивесинде къошулгъан паралар «Живой» фондынынъ эсабына тюшип, Русие регионларында экимлер ве тиббий хадимлер ичюн шахсий къорчалав васталарыны сатын алмагъа ёлланыладжакъ.
Doctor Jazz Party хайрие онлайн-марафонынынъ информацион шериклери:
«Россия 24» ве «Россия-Культура» телеканаллары, Вести.Ru информацион каналы, «Вести FM» радиостанциясы, Радио JAZZ 89.1 FM, «Яндекс» араштырув системасы ве интернет-портал, «Национальные приоритеты» АНО тешкиляты/ сайт стопкоронавирус.рф, Sputnik радиосы.
Koktebel Jazz Party 2003 сене Коктебель джазынынъ темель къоювджысы — журналист Дмитрий Киселёвнинъ шахсий тешеббюси киби пейда олды. Кичик Къырым кою дюньяджа белли джаз тедбирлери джедвелине кирген фестивальге ад берди. Чешит сенелери фестивальни эфсаневий джаз давулджысы Джимми Кобб (АКъШ), энъ яхшы латин джазы альбомы ичюн «Грэмми» мукяфатынынъ лауреаты Гонсало Рубакальба (Куба), озь инновацион техник чалувнен белли олгъан американ бас-гитараджы ве контрабасчы Стэнли Кларк, ню-джаз йылдызлары Club Des Belugas (Алмания), уникаль саксофонджы Роберт Анчиполовский (Исраиль), Гейдельбергтен De-Phazz адлы алман группасы зиярет эттилер. KJP-2017 тедбирининъ мусафири РФ президенти Владимир Путин олды.
Koktebel Jazz Party — бу тек дюнья севиедеки джаз дегиль, бу музыка, денъиз, вуджут ве гонъюльнинъ екяне вибрациясыны догъургъан акъикъий азатлыкътыр. Фестивальни «Россия сегодня» халкъара информацион агентлиги кечире. Фестиваль тешкиль этилювинен «Красный квадрат» адлы медиагруппа огъраша. 2014 сенеден берли Koktebel Jazz Party Русие Федерациясы медениет везирлигининъ дестеги иле кечириле.
Русиеде догъру инвестициялар фонды (РФПИ) 2011 сенеси тесис этильди. Шериклеринен бераберликте РФПИ 80-ден зияде лейха амельге кечирди, оларнынъ умумий колеми 1,8 трлн рубледен зияде, олар Русие Федерациясынынъ 95% регионыны къаплап ала. РФПИ, 18 мемлекеттен етекчи халкъара инвесторларнен бераберликте, стратегик ортакълыкълар яратты. Оларнынъ умумий колеми 40 млрд долларны тешкиль этти. РФПИ COVID-19 хасталыгъына къаршы фааль иш алып бара: EMG экспресс-диагностикасы боюнджа Русие-Япония системасынынъ истисалы тизильди, о максималь дереджеде догъру нетидже косьтере (99,9%), тестлернинъ тезлиги де буюк (30 дакъкъагъадже), «Химрар» ширкетлер группасы иле бераберликте «Фавипиравир» деген вирускъа къаршы илядж истисалы яратыла. РФПИ коронавирускъа къаршы Альянс яратылувынынъ тешеббюсчилеринден бири олды. Бу Альянскъа даа Российский союз промышленников и предпринимателей адлы бирлешме (РСПП), Яндекс, Mail.ru Group ве «Россия сегодня» халкъара информацион агентлиги кирди.
«Живой» адлы хайрие, буюклерге ярдым фонды 2010 сенеси тесис этильген эди. Фонд, аджеле тедавийлевде ве реабилитацияда мухтадж18 яшындан 60 яшкъадже агъыр хаста адамларгъа ярдым эте. 2017 сенеден берли фонд эм де Русие хастаханелерине ве ичтимаий муэссиселерге ярдым этюв ёнелишинде чалыша. Коронавирус пандемиясы себебинден фонд Русие регионларындаки хастахенелерде чалышкъан экимлерге шахсий къорчалав васталарыны сатын алмакъ ве ёлламакъ боюнджа лейха башланувы акъкъында къарар алды. Апрельнинъ 22 кунюне фонд бутюн Русие боюнджа 26 хастаханеге ярдым косьтерди.