Яков Окуннинъ интернациональ джаз ансамбли фестивальнинъ эсас санасында «Подмосковные вечера» ве «Старый клен» аваларыны джаз аранжировкада, эм де эски американ йырларны иджра этеджек.
«Мен ичюн эки аваны иджра этмек муим эди. «Подмосковные вечера» йырынынъ аранжировкасы аджайип джаз чалгъыджысы Герман Лукьянов иле япылгъан эди, амма о, 40 куньден эвельси вефат этти, онынъ ичюн мен буны онынъ шерефине чалмагъа истейим. «Старый клен» йырына кечсек, мен онынъ нагъмесини пек севем, ве оны джаз шекильде чалмагъа мумкюн деп, тасавур этем», — деп, тариф этти коллективнинъ лидери Яков Окунь матбуат-конференции.
Четэль чалгъыджылар Коктебельде джаз фестивальде иштирак этмектен пек мемнюн олгъанларыны къайд эттилер.
«Яков — аджайип профессионал, о, джазны пек севе, музыканы пек яхшы дуя, онынънен чалмакъ буюктен-буюк зевкътыр. О, мени Koktebel Jazz Partyде иштирак этмеге давет эткенине пек мемнюним ве биз бу фестивальде сонъки сефер чыкъышта булунмаймыз, деп, умют этем», — деди американ баритон-саксофонджы Гарри Смульян.
Сингапур йырджысы Алимей Фернандес озь невбетинде озь мемлекетинде чалгъыджыларгъа Koktebel Jazz Party акъта тариф этмеге сёз берди.
«Бу аджайип ердир, ада да мында пек яхшы. Мен бу фестивальде Сингапурны такъдим эткенимден мемнюним, мен бу фестиваль акъта Сингапурда мытлакъа айтарым, бельки, даа бир кимсе фестивальге кельмеге истер. Мен ичюн мында чыкъышта булунмакъ ве бойле чалгъыджыларнен къонушмакъ буюк шерефтир».